नेपालको सुपर सिक्समा पुग्ने सम्भावना लगभग समाप्त

शनिबार, २६ फागुन २०७४, २१ : २५
      शब्द  
104 पटक पढिएको

काठमाडौं । जिम्बाब्वेमा जारी आइसीसी विश्वकप छनोट क्रिकेट प्रतियोगिताअन्तर्गत् आफ्नो तेस्रो खेलमा नेपाल अफगानिस्तानसँग ६ विकेटले पराजित भएको छ । शनिबार भएको खेलमा टस जितेर पहिले ब्याटिङ गरेको नेपालले कप्तान पारस खड्काको सर्वाधिक ७५ रनको मद्दतमा निर्धारित् ५० ओभरको एक बलअगाडि अलआउट हुँदै १९४ रन जोडेको थियो ।

नेपालका लागि दीपेन्द्रसिंह ऐरीले ३२ रन बनाए भने ज्ञानेन्द्र मल्ल र आरिफ शेखले समान २३/२३ रन जोडे । अरु खेलाडीले दोहोरो अंकको रन बनाउन सकेनन् । बलिङतर्फ अफगानिस्तानका मोहम्मद नाबीले सर्वाधिक ४, कप्तान रसिद खानले ३ तथा शापूर जर्दानले २ विकेट लिए । जवाफमा १९५ रनको चुनौती अफगानिस्तानले ३९औं ओभरमा ४ विकेट गुमाउँदै पूरा गर्‍यो । अफगानिस्तानका नाजिबुल्लाह जर्दान ५२ रनमा अविजित रहे । रहमत शाहले ४६, मोहम्मद नाबीले ३४ रन बनाएको अफगानी इनिङ्समा जावेद अहमदले २६ तथा कप्तान रसिद खानले २१ रनको योगदान गरे ।

नेपालका लागि दीपेन्द्रसिंह ऐरीले २ तथा करण केसी र सन्दीप लामिछानेले समान १/१ विकेट लिए । समूह चरणमा यसअघि खेलेको तीनओटै खेलमा पराजित अफगानिस्तानले अन्तिम खेलमा नेपाललाई पराजित गरेसँगै ‘सुपर सिक्स’ चरणमा पुग्ने सम्भावना कायमै राखेको छ ।

लगातार तेस्रो हार व्यहोरेसँगै नेपालको भने सुपरसिक्स चरणमा प्रवेश गर्ने सम्भावना लगभग समाप्त भएको छ । नेपाल पहिलो खेलमा आयोजक जिम्बाब्वेसँग ११६ रनले तथा दोस्रो खेलमा स्कटल्यान्डसँग ४ विकेटले पराजित भएको थियो ।

समूहको अन्तिम खेलमा हङकङलाई पराजित गरे पनि नेटरनरेट निकै कमजोर भएका कारण नेपालको सम्भावना लगभग सकिएको हो । नेपालले समूहको अन्तिम खेलमा आगामी सोमबार हङकङसँग प्रतिस्पर्धा गर्नेछ ।

 

प्रतिक्रिया दिनुहोस्